Jonás Truebaren eskutik: Jonas Mekasen Out-takes from the Life of a Happy Man

Aurkezlea: Patxi Burillo. Zinematografia bokala
Prezioa: Euro 1 Ateneoko txartela aurkeztuta (sarrera arrunta: 3 euro)

Out-takes from the Life of a Happy Man, Jonas Mekasena. 2012 / 68 min / Koloretan-Zuri-beltzean / Ameriketako Estatu Batuak
– Zuzendaria: Jonas Mekas
– Gidoia: Jonas Mekas
– Argazkia: Jonas Mekas
– Parte-hartzaileak: Friedl Bondy, James Broughton, William S. Burroughs, Richard Foreman, Robert Frank, Ken Jacobs, Peter Kubelka

“1960-2000 urteetako film osoetan erabili gabeko egunkari-eszena laburrez osatutako filma; eta edizioan grabatutako bideo auto-erreferentzialeko artxibo-metrajea. Familia, lagun, neska-lagun, Hiria, urtaro eta bidaiei egindako begirada laburrak. Tarteka hitz egiten dut, gogoratu egiten dut, edo aurreko urte haietan grabatutako musika jartzen dut, Auguste Varkalisen azken piano-inprobisazioez gain. Nolabait poema autobiografiko bat da, egunkari bat, zoriontasunaren eta bizitzaren ospakizun bat. Gizon zoriontsutzat dut nire burua”. (Jonas Mekas)

Azaroan Besos robados (Baisers volés, 1968) programatu ondoren, Jonás Truebak bere bigarren eskutik aukeratutako filma Jonas Mekas (1922-2019) zinemagile lituaniarraren Fragmentos de la vida de un hombre feliz (Out-takes from the Life of a Happy Man, 2012) da.

Mekas da, zalantzarik gabe, XX. mendearen bigarren erdiko eta XXI. mendearen hasierako zinemagile garrantzitsuenetako bat. Kontzentrazio-esparru nazietatik ihes egin ondoren Ameriketako Estatu Batuetara emigratu zuen eta New Yorken hartu zuen bizilekua. Bertan, bere bizitza Bolex kamera batekin filmatzen hasi zen, AEBko underground zinemaren aita bihurtuz eta Walden (1962) edo Lost, Lost, Lost (1976) bezalako film enblematikoak sortuz. Bere zinemari buruz, Jonás Truebak dioenez, “zaharrago eta konplexuago sentiarazten zaituzten film gehienek ez bezala, Mekasen hauek gaztetu egiten gintuzten denok eta, bide batez, balizko zinemagile txartela ematen ziguten, betiereko gaztetasunaren elixirra, hemen eta orainaren estasia, inori konturik eman gabe gure filmen materia izateko aukera”.

Fragmentos de la vida de un hombre feliz lanean, Mekasek Jonás Truebaren esaldia berresten du, bere zinema osoa laburbil dezakeen obra batekin. Zinemagileak berak filmean dioen bezala, helbururik gabeko, zentzurik gabeko irudien film baten aurrean gaude, bera eta bere lagunengandik harago joan ezin dena. Horregatik, bere lagun bihurtzen gaituen film baten aurrean gaude, eta bere esaldi ospetsuetako batek dioen bezala, gogorarazten digu “gaizkia eta itsustasuna beren kabuz zainduko direla; ongia eta edertasuna dira gure zaintza behar dutenak”.